"ბიჭს, რომელიც მიყვარს, სხვა გოგოს დასავიწყებლად ვჭირდები"

ოცნებები ერთბაშად დამემსხვრა. თურმე ყველას არ უნდა ენდო, გრძნობებს არ უნდა აჰყვე. მე ცაში ერთბაშად ავფრინდი და მერე ასევე ერთბაშად ძირს დავენარცხე.
ხუთი თვეა, ერთ ბიჭს ვხვდები. მის მიმართ სერიოზული გრძნობები გამიჩნდა, უფრო ზუსტად კი, მიყვარს. ჩემი ძმის დაბადების დღეზე ჩვენს მეზობელს მოჰყვა, მაშინ გავიცანი და საოცრად მომეწონა. როცა მეორე დღეს დამირეკა, ბედნიერებისგან მეცხრე ცაზე ვიყავი. შეხვედრა მთხოვა და მეც დავთანხმდი. საოცრად კარგად მექცეოდა, ჩემ მიმართ სითბოს და სიყვარულს არ იშურებდა. მეგონა, რომ მასაც ისევე ვუყვარდი, როგორც მე მიყვარდა.
ერთ დღეს ჩემთან ნასვამი მოვიდა, ცუდ ხასიათზე იყო. ვთხოვე, მოეყოლა, რა აწუხებდა. ჯერ თავს იკავებდა, მერე კი გული გადამიშალა. მითხრა, რომ იმ დილით თავის ძველ შეყვარებულს შეხვდა და იგრძნო, რომ მის მიმართ გრძნობები არ ჰქონდა განელებული. გამწარებულმა კი ძმაკაცებთან ერთად იქეიფა, იმიტომ დათვრა, რომ დარდი დაევიწყებინა. მითხრა, ღვინომაც არ მიშველა და შენთან იმიტომ მოვედიო. გადავირიე, ვუთხარი, აქამდე რატომ არ მითხარი, რომ სხვა გიყვარდა–მეთქი. მთვრალმა პირდაპირ მითხრა, მის დასავიწყებლად მჭირდებოდიო. საშინლად გავბრაზდი, სახეშიც კი გავარტყი და წამოვედი.
რამდენიმე დღის განმავლობაში ხმას არ ვცემდი. ის კი მესიჯებს მიგზავნიდა, პატიებას მთხოვდა. ბოლოს გულმა ვერ მომითმინა და შევხვდი. მეუბნება, არაფერს გიმალავ, შენც მომწონხარ, მაგრამ მის მიმართაც ისევ მაქვს გრძნობაო. მეხვეწება, რომ მის დავიწყებაში დავეხმარო. იმ გოგოს სხვა უყვარს და გათხოვებასაც აპირებს, ამიტომ ჩემს შეყვარებულს მასთან არანაირი შანსი არ აქვს.
დაქალები მეუბნებიან, რომ მიყენებს და მერე მიმატოვებს. მეც ვხვდები, რომ კარგ მდგომარეობაში არ ვარ, მაგრამ იმედს ვეჭიდები. მგონია, რომ ძველ სიყვარულს არათუ დავავიწყებ, მასზე მეტად შევუყვარდები. მის გამო ყველაფრისთვის მზად ვარ. მირჩევნია, ბევრი რამ მოვითმინო, ბევრ რამეზე დავხუჭო თვალი, ოღონდ არ დავკარგო. ვიცი, არასწორად ვიქცევი, მაგრამ სხვანაირად არ შემიძლია.
მკითხველი, 16 წლის